El Dio i la Lojika (Deus sive Logica)

(Puvlikado en Sefaradi Muestro, el 10.II.2010)


La Lojika es invisible, ma es real. Los sientifikos saven ke sus deskuvrimyentos vyenen de la Lojika. Las kortes o trivunales de justisya saven ke deven ovedeser la Lojika. Los teknikos saven ke la sivilisasyon funsyona kon la Lojika.

La Lojika es la mayor realitad anke no se veya. No todo lo real es materyal. La Lojika esta por ensima del ombre, si mos plaze komo si no mos plaze. Tenemos ke avokar la kavesa delantre de la Lojika. Ken es kulpavle, kale rekonoser ke la Lojika lo demuestra. Es mas grande ke mosotros. Es eterna. Lo ke es vedraderamente lojiko agora, lo sera en syen o dosyentos anyos.

La Lojika es el D.io o esta mui serka del D.io. Es su ley eterna para el mundo.

Por eso el D.io es para mi Lojika. Es el sensyo y la eksplikasyon ke kale tener toda la realitad, todo el Universo.

Kreyer en el D.io no es tanto pyensar en komo seya El, ama pyensar kontando kon El,
tenerlo presente komo la eksplikasyon de la realitad, mezmo de muestras sufriensyas, porke todo tyene ke tener una eksplikasyon lojika.

Su eksistensya se puede demuestrar lo mezmo ke la eksistensya de la Lojika, porke el D.io "es" la Lojika, el sensyo de kuanto eksiste. Ken kree en la Lojika, kreye en el D.io anke seya sin saverlo.

Yo veyo ke no se bivir sin kontar kon el D.io, no saveriya organisar mi vida sin El, porke lo entyendo komo el sentro lojiko de toda la realitad, una realitad ke tyene un sentro, una unitad, una koerensya; otras personas pueden bivir atendyendo solo a las kozas separdas, komo si no tuvyeran ke ver unas kon otras, komo si no las unyera la Lojika (o el D.io); ma sentiran algo de manko, anke sin saver ke les manka.

= = = =

Kuala es la relasyon de la Lojika kon la realitad materyala?

La Lojika manda ensima de eya komo una Ley; la atraye; ma la realitad materyala no yega a ser del todo lojika.

La rason de esto esta en la mezma naturaleza de la rason. Toka solo lo ke es komun en las kozas. Toma deyas solo lo ke se komparte: en el rasonamyento umano. ke es muestra manera de yegar a la rason o la Lojika, estas kozas kompartidas se yaman konseptos, i dospues los unimos en proposisyones, estas en silojismos, etsetera.

Ma en la realitad keda syemre algo de uniko en todas las kozas. Esto uniko no se puede rasonar, porke es uniko.

Estas formas unikas de la realitad enmateryala forman por definisyon sus irregularitades.

Por esto, la materya ovedese a la Lojika, ma no yega a tomar formas del todo lojikas. Forma estreyikas esferoydales ma no esferas perfektas; sus superfisyes estan inchidas de irregularitades. Yo puedo kerer sigir una kondukta lojika en mi alimentasyon, mis relasyones umanas, ma nunka konsigo ke seya perfekta (i es mejor ke no lo seya; sera asina mi kondukta)

En pokos byervos: la Lojika es enmateryala, es eterna (las Matematikas son eternas), estruktura la materya, esta por ensima de la materya, la govyerna, la atraye, es su ley, le da su sensyo, kon lo ke el D.io es la forma finala de lo lojiko, lo mas lojiko, porke el D.io es el buto final de toda la realitad, de todas las atraksyones i tendensyas ke reunen en la Lojika la singularitad de la materya.